Hið árlega golfmót sem nefnt hefur verið "Einvígið á Nesinu" var haldið á frídegi verslunarmanna, mánudaginn 1. ágúst. Þetta er góðgerðamót, þannig að flutningafyrirtækið DHL afhendir peningaupphæð til að styrkja gott málefni. Í þetta sinn var það Barnaspítalasjóður sem varð aðnjótandi styrksins. Formaður og gjaldkeri Hringsins tóku því við ávísun að upphæð 1 milljón króna í mótslok. Fyrirtækinu eru hér með færðar bestu þakkir fyrir styrkinn sem mun verða notaður í þágu íslenskra barna.

Mótið var afar skemmtilegt að vanda, vel skipulagt og áhorfendur margir. Það voru Íslandsmeistarar og golfmeistarar golfklúbbanna á Reykjavíkursvæðinu sem skemmtu áhorfendum með glæsilegum tilþrifum. Á myndinni hér fyrir neðan má sjá Nökkva Gunnarsson sigurvegara mótsins.