Árshátíð Hringsins

Árshátíðin hefur löngum verið haldin nálægt jafndægri á vori. Í starfssögu Hringsins segir að árshátíðir hafi verið haldnar í „ýmsum veitingasölum í borginni og nágrenni.” Meira hefur verið haft við á tuga-afmæli félagsins, svo sem á 100 ára afmælinu árið 2004. Margir góðir gestir sátu þá hátíð, m.a. forseti Íslands og heilbrigðisráðherra ásamt mökum, og mikill fjöldi félagskvenna og makar þeirra, vinir eða skyldmenni. Um hana segir í dagskrá félagsins það ár: „Aldarafmælishátíð félagsins á Hótel Nordica við Suðurlandsbraut kl. 19:00. Samkvæmisklæðnaður. Vönduð dagskrá með fordrykk, söng, danssýningu og hljóðfæraslætti. Dansað verður með glæsibrag að lokinni þríréttaðri máltíð.”

Árshátíðin 2010

Árshátíð Hringsins 2010 var haldin þann 11. mars í Veisluturninum í Smáranum. Árshátíðarnefnd hafði staðið sig með sérstakri prýði í sambandi við að velja skemmtikrafta kvöldsins. Jóhannes Kristjánsson, eftirherma, talaði undir rós um að kannski væri hann gjaldgengur sem Hringskona, því að eftir að hann fór í hjartskiptin slægi í honum kvenhjarta. Þá kom fram frábært danspar sem sýndi suður-ameríska dansa. Þetta eru upprennandi danssnillingar þjóðarinnar og gestir voru afar hrifnir. Nú var röðin komin að Helgu Möller, söngkonu, að syngja fyrir okkur lög eftir hana sjálfa og aðra. Að lokum kom til okkar grínistinn Helga Braga Jónsdóttir og mætti með magadansbelti um sig miðja. Fékk hún félagskonur og gesti til að standa á fætur og sveifla mjöðmum um stund áður en hún dembdi yfir okkur skemmtisögunum. Veislustjóri var Edda Sigrún Ólafsdóttir og píanóleikari kvöldsins Heimir Sindrason. Starfsfólk Veisluturnsins stóð sig afar vel og hugsaði vel um okkur allt kvöldið.