Hringurinn

Jólakaffi Hringsins var að venju haldið fyrsta sunnudag í desember. Hátíðin fór fram á Broadway við Ármúla. Þar voru í boði hefðbundið kaffihlaðborð, happdrætti og skemmtiatriði. Allir hinir frábæru skemmtikraftar gáfu vinnu sína og börnin, sem voru í meiri hluta meðal hátíðargesta, gerðu góðan róm að öllum skemmtiatriðunum. Hringskonur sáu sjálfar um veitingarnar og afgreiðsluna og nutu dyggrar aðstoðar lækna á Barnaspítalanum.

Hringurinn vill hér með þakka öllum þessum aðilum fyrir hjálpina. Einnig þeim fjölmörgu fyrirtækjum og einkaaðilum sem gáfu happdrættisvinningana.

Jólabasar Hringsins var haldinn sunnudaginn 6. nóvember. Seldar voru kökur, sem Hringskonur höfðu bakað, og margvíslegir handavinnu- og handverksmunir, sem félagskonurnar hafa búið til á liðnu starfsári. Aðsóknin var með ágætum og vörurnar seldust vel.

Hringurinn vill hér með þakka öllum velunnurum sínum fyrir þátttökuna. Andvirði basarsins rennur að venju óskipt í Barnaspítalasjóð Hringsins.

Jólakort Hringsins árið 2011 er komið í dreifingu. Það er hannað af Lenu Björk Bjarnadóttur, sem er dóttir Hringskonu. Kortið fæst í tveimur litum, rauðum og hvítum með gyllingu. Pakkarnir innihalda 10 kort, fimm rauð og fimm hvít, og kosta 1100 krónur. Jólagjafakort ("til" og "frá" kort) eru líka til sölu og kostar pakki með 10 kortum 500 krónur. Frekari upplýsinga má leita með því að senda tölvupóst á netfangið: jolakort@hringurinn.is

Helstu sölustaðir eru: Veitingastofa Hringsins á Barnaspítala Hringsins, BUGL,  Hagkaup, Lyf og heilsa, Lyfjaver og mörg einkarekin apótek, Melabúðin, Úlfarsfell, Hjá Hrafnhildi, Hamborgarafabrikkan, Tekk company, Frú Lauga, Ostabúðin á Skólavörðustíg og á Bitruhálsi, Hafið, Fiskiprinsinn Garðabæ, Gallerý Fiskur, Rokký Reykjavík, Vefta og  fleiri. Á Akureyri, Hagkaup, apótekin, Do Re Mí barnafataverslun Glerártorgi. Á Húsavík, bókaverslun Þórarins. Á Ísafirði, Hamraborg. Einnig eru söluaðilar í Keflavík, á Sauðárkróki, á Selfossi og á Egilsstöðum. Að venju rennur allur ágóði af sölu kortanna í Barnaspítalasjóð, en úr honum eru veittir styrkir til góðra málefna.

Sjóðurinn

Hringurinn og Barnaspítalasjóðurinn/The Children‘s Hospital Fund

Markmið félagsins er að vinna að líknarmálum, sérstaklega í þágu barna.
Félagskonur vinna að fjáröflun með ýmsum hætti.
Starf félagsins byggist á sjálfboðavinnu.
Úr Barnaspítalasjóði Hringsins eru veittir styrkir til kaupa á
ýmiskonar búnaði og tækjum sem notuð eru til að
veita veikum börnum á Íslandi nauðsynlega meðferð og aðhlynningu.
Stærstu styrkirnir hafa farið til Barnaspítala Hringsins
og til Barna- og unglingageðdeildar Landspítalans.
Heimasíða félagsins er www.hringurinn.is.

Stuðningur ykkar skiptir okkur miklu máli.

Jólakaffi

Jólakaffi Hringsins er haldið á hverju ári, fyrsta sunnudag í desember að Broadway við Ármúla.
Þar er á boðstólum glæsilegt kaffihlaðborð með brauði, kökum og tertum sem Hringskonur hafa sjálfar útbúið. 
Glæsilegt happdrætti hefur mikið aðdráttarafl fyrir yngra fólkið
en vinningarnir eru allir gefnir af velunnurum
Barnaspítalasjóðs Hringsins, fjölda fyrirtækja og einstaklinga.
Ýmsir góðir skemmtikraftar koma einnig fram og hafa sumir gefið vinnu sína til þessa málstaðar áratugum saman.
Læknar af Barnaspítalanum hafa undanfarin ár hjálpað til í fatamóttöku, við sölu á happdrættismiðunum og í eldhúsi eftir að jólakaffinu lýkur.

Ágóðinn af jólakaffinu rennur óskiptur í Barnaspítalasjóðinn, sem styrkir veik börn á Íslandi.

Jólakaffið 2010 var haldið sunnudaginn 5. desember á Broadway
eins og undanfarin ár. Aðsókn var góð og skemmtiatriðin féllu í
kramið hjá börnunum.

Borð svignuðu af veitingum og happdrættið gekk vel. 
Við þökkum gestum og velunnurum Hringsins fyrir þeirra framlag. Hittumst heil að ári.

Veitingastofan